الاسم : امل عبدالله سعد
مسقط الراس ومراتع الطفوله
مسقط الرأس الخرطوم .. وطفولتي كلها كانت في جمهوريه ايران الاسلاميه حيث كان والدي مبعوثا بالسفارة السودانيه في طهران
من خلال طفولتك في ايران هل كنت تسعرين بان هناك فرق كبير في العبادات بين الشيعه والسنه
اكيد في فرق في العبادات .. لكن علي الرغم من كداالشعب مسالم جدا عكس ما يشاع عنهم وما حصل يوم ضايقونا في اجتماعاتنا لصلاه العيد او التراويح .. والاختلاف دا ما اثر علي بل بالعكس وسع مداركي وخلاني اطلع علي حاجات يمكن ما كان اعرفها لو ما خالطهم ١٠ سنين
المراحل الدراسية وابرز زكرياتها واشهر ناس من دفعتك؟؟؟
من الاساس حتي الثانوي قريت في العربيه السودانيه -طهران
ناس دفعتي في المدرسه كلهم اتوزعو في نطاق مختلفه في العالم والجميل مازلنا علي تواصل
وجيت السودان للجامعه ودرست كليه الطب جامعه الخرطوم
المؤهلات الاكاديميه ؟؟؟
بكلاريوس الطب والجراحه -جامعه الخرطوم
مجال العمل الحالي
مساعد تدريس في كليه نبتة
طبيب عمومي في مستشفي الشرطه- قسم النساء والتوليد
هل اضافك لك العمل وسط قوه نظاميه اشياء جديدة؟؟؟
اي زول كان بيقول لي الشغل مع القوات النظاميه صعب وكدا.. لكن ما واجهتني المشكله دي في مستشفي الشرطه .. بل بالعكس مستشفي منضبط ومنظم
اهم الانجازات التي تسعين لانجازها ؟؟؟
ماجستير في التعليم الطبي
بدايه التخصص في النساء والتوليد ان شاء الله
كلمات عن كلية نبتة
كليه نبتة علمتني كل حاجه تقريبا
وقربتني من الطلبه وورتني جمال العلاقه بين الطالب واستاذه
دا غير العلاقه الجميله بسن الاستاف والزملاء
المرحله الجامعيه بين الامس واليوم
امكن بالنسبه لي ما اختلفت كتير ..
يقولون لا رجعةعن التعليم اون لاين في كل العالم حتي بعد كرونا.ماتعليقك؟؟؟؟
انا اعتقد انو التعليم الاونلاين بدا قبل الكورونا لانو المحاضرات كان بتترسل بوسائل التواصل وحسي حصل modification بالمنصات التعليميه
لكن في رأي العالم حيضطر للرجوع للتعليم المباشر لانو الاونلاين بيفقد الاستاذ اهم شي وهو احساس وصول المعلومه للتلميذ عبر تعابير الوجه والمشاركه والنقاشات
رساله للطلاب الخريجيين من كلية نبتة
نصيحتي انهم يجربو يدخلو في مجال التدريس لانو الطب يعتبر علم ينتفع به وانت حتورثه للاجيال البعدك
والنصيحه التانيه ما تضيعو الزمن وابدو طوالي خططو للخطوه الجايه
رسالة للطلاب الجدد في الدراسه الجامعيه:-
نرحب بيهم اول شي واتمني ليهم سنة او سنين دراسيه موفقة وسعيدة
وانهم يستفيدو من سنين الجامعه الجد حيفقدوها بعد يتخرجو..ومايقصرو نفسهم علي الاكادميات .. لانو حيلقو نفسهم دخلو في اسلوب حياه صعب لازم الزول يكون عنده حاجه بيرفه بيها عن نفسه من وقت للتاني
كيف ترين مسيرة كلية نبته .اين وصلت وكيف تسير؟؟؟
كليه نبته كليه مميزه .. اري انو حيكون عندها مستقبل مزهر ان شاء الله والفضل في ذلك بعد الله سبحانه وتعالي بروفيسور الزبير
هل ما زال الخريج السوداني مطلوب ومرغوب في سوق العمل الاقليمي والدولي وما هو اكثر شيئ يميزه؟؟؟؟
اكيد طبعا .. الخريج السوداني بالاضافه للمستوي الاكاديمي العالي بيمتاز بحسن الخلق واعتقد دا البميزنا من الشعوب التانية
تحديد المسار الاكاديمي للطالب بين رغبته وتوجيهات واختيارات الاسرة
اعتقد انو الرغبه في المجال هو اهم عامل لاختيار المسار الاكاديمي لانو بدون الرغبه الطالب بيفقد شغفه في مجاله ودا غالبا بيحدث بعد التخرج .. تلقي طبيب ما مهتم بمريضه لانه الطب ما كان شغفه من البدايه .. واذا الزول دخل المجال عن غير رغبه وقاعده تحصل كتير .. فالشي الجميل في الطب انو واسع تقدر تتجه للتدريس او للبحوث او التجارب المعمليه او طب المجتمع