“1”
مافي اتنين في الدنيا بيختلفو انو المحبة
والقبول هبة إلهية بيوزعا ربنا جل وعلا
بين عبادو وخلقو بي درجات متفاوتة
في اي مؤسسة في زول محدد كل الناس
بتجمع عليهو وتبصم علي حبو بالعشرين
الزول دة بيكون مختلف في كل تفاصيلو
عن الآخرين مختلف في انضباطو
في تعاملو في سلوكو في ادائو
ودة الشي البيخلي كل الناس تجمع
عليهو بدون مزايدة او محاباة
في المؤسسات التعليمية وفي اغلب الاحوال ويمكن دة الطبيعي والعادي انو بتكون في حساسية متوارثة او يمكن تكون ازلية
بين الطلاب واصطاف التدريس او الادارة
وطابع العلاقة بيتسم بالندية
وعدم قبول بين كل الاطراف
بس في ناس كليتنا مختلفين تماما
من اي مؤسسة مرت علي قبل كدة
ودة ماانحياز والله بقدر ماهو كلمة
حق لزاما علي اقولا من باب احقاق
الحق ….
السمستر الفات سمستر الاوبس
لغير الناطقين بها (نساء وتوليد)
كان من اروع السمسترات الي مرت علينا
وجات روعة السمستر من روعة الاصطاف
او طاقم التدريس رغم انها كانت فترة
وانتهت الا انو مرورهم علينا ابدا ماكان عابر
وخلفو اثرهم وتركو بصمتهم وراهم
متي ماجات سيرتهم جات زكراهم الطيبة
قبل اسبوعين احتفلنا بيهم احتفال صغير
رغم اننا مابنقدر نجازيهم علي جميل
صنايعهم معانا الا انو كان من اروع الايام اللي مرت علينا في تاريخ الكلية وانا حاسميهو يوم من ايام نبتة الخالدات حقيقي وحيفضل
جوانا لاخر يوم في حياتنا
حاخدكم جولة صغيرة عشان اعرفكم
علي اصطاف كليتنا الظابط للابد
حأبدا ليكم بي منسقة كليتنا
#حبيناك_من_قلوبنا💚
____________
ابتداءا من كل مراحلي الدراسية
مرورا بي كل المؤسسات اللي اتوظفتا فيها
لاول مرة يمر علي زول علي رأس هرم
او ادارة وهو زول مختلف تماما في كل تفاصيلو …
وبما اني قديمة عهد بالكتابة
لأول مرة احسن اني ماقادرة اكتب
او بالاصح انو الحروف ما عايزة تطاوعني
د.ميساء المأمون منسقة كليتنا
ابسط حاجة ممكن اقولا عنها انها الزول المناسب في المكان المناسب
المعني الحرفي لملاك الرحمة ..
علي مدار كل السنين دي وانا مندهشة
جدا بل مذهولة بي شخصيتا الملانة
بي لطف الدنيا كلو…
الجدول بنختو نحن ونتفق عليهو
هي بس بتاكد عليهو …
حريصة علينا حرص الام علي اولادا
في كل امتحان بتمر علينا قاعة قاعة
عشان تطمئن علينا وحقيقي مابنطمئن
الا تطل علينا بي طلتا البهية …
اذا مامرت علينا بترسل لينا آخر اليوم
في قروب الدفعة تتطمئن علينا اشتغلنا كيف
غريزة الامومة الفيها ماعادية
بتحسسنا انو نحن بناتنا واولادا قبل
ما نكون طلابا…
مفروض يكون في نموذج في الطب
اسمو”ميساء المأمون ” اي والله
اول ماتتخرج يعملو ليك معاينة علي حسب النموذج دة ويقولو ليك انت اجتزتا المعاينة ومواصفاتك مطابقة للنوذج دة..
انا محظوظة جدا اني كنت جزء من الناس اللي نالهم حظهم انهم ينهلو من علمك عشان في سنين جايات حأتباهى بيك واقول
ليهم انا تلميذة د. ميساء المامون💜
يتبع ،،،،،
#التوقيع
#دلدوماية